الله يعين ام الخدر
الله يعين ام الخدر من شالت امها
شلون وبهذا العمر عاشت المها
==================
زينب تنادي يالولي بتك يتيمه
يوحشني دار ام الحسن امي الحنينه
لاتظن تهدأ ونتي ونوحي لجيمه
شلون امي فاطمه تفارك نزلها
===================
يابويه يوحشني النزل سويلي جاره
لفراك ياحيدر صعب تلتهب ناره
وللكلب ياحيدر علي كطع اوتاره
ياريت امي فاطمه ترجع لهلها
===================
الاهل مشتاكه تره الملكات الاحباب
وياج يايمه انصبت وبعصرت الباب
شلون عفتيني يتيمه وياج الي عتاب
تدرين انتي الزينب الدنيا واملها
===================
مشتاكه روحي الشوفتج يحبيبه يمه
من زغر سني مبتلي كلبي بهمه
انكسر كلبي من شفت ظلعج ودمه
شلون يابويه الزجيه ايفيض دمها
===================
انهدر دمج يم حسن من راح جدي
وآنه بكيت بحسرتي ودمعي اعلى خدي
امنين اسولف محنتي بيا جرح ابدي
جرحج ييمه لو جرح سيد رسلها
====================
بعيني شفت نعش النبي يايمه من شال
وشفت الذي صار وجره من كوم الانذال
وشفت الوصي يم الحسن مجتوف بحبال
وشفت الزجيه والذي اسقط طفلها
====================
شلون تغمض عيني يالزهره ييمه
متعوده طول العمر صدرج اشمه
والشمل ياام الوفه ياهو اليلمه
وبنتج يتيمه وعالوجن يجري دمعها
====================
يجري الدمع فوك الوجن مكدر امنعه
واتصور اونينج ييمه وبذني اسمعه
منهو ييمه المنكسر من عنده ظلعه
احا يعصرة فاطمه وكسرت ظلعها
====================
منكسر من عندج ظلع من عندي ظلعين
يابعد روحي ودنيتي يم حسن وحسين
شلي ييمه بالعمر ياضوه العينين
انتي الحنينه وبالوصف طيب لبنها
تأليف العلوية المقعدة والدة السيد زمن المحنّة
التي وصفها الشهيد الصدر بشاعرة الحسجة